Casa Scaparone Azienda Agricola. Turism Agricol. Ant la Comun-a d’Alba, a 5 minute dal sènter.
I soma na Comunità ‘d famije. I condividoma le ròbe ‘d tuti ij dì e ‘l travaj agricol, i trasformoma ij frut ëd la tèra.
COLTIVASSION con métod omeodinàmich. Na pessa 'd tèra taca e branca ëd 25 giornà ëd teren coltivà a granaje, vërdure, pomé, vigna e pra da le famije dla comunità.
ÒSTO con menù tìpich e stagional, prodòt dl’asienda e ambient tradissional. Cura special për menù vegetarian.
OVERTURA DL’ÒSTO: disné saba e domìnica. Sin-a vënner e saba. Servissi ëd mesa pension për ij turista dle stansie: tuta la sman-a, gavà ij mèis ëd gené e fërvé.
STANSIE për turism agrìcol: da mars a dzember, stansie dobie con bagn, për vive l’esperiensa dla campagna ansema a coj dla comunità e alimentesse con ij prodòt ëd nòstra asienda, con ël menù dël dì.
Pien-a campagna, pra, vigne, pomé e bòsch. Vista da l’àut ansima Alba, an sle Langhe e an sël Roé. Possibilità dë spassëgiade compagnà con j’aso, ëdcò për grup, pic-nic.
Possibilità ‘d vive quàich dì con ij mémber dla comunità, travajand ant j’òrt e ant ij divers setor ëd trasformassion, preparassion dël mangé, pan, artigianà e stale.
Mùsiche tradissionaj sonà dal viv. Ampi spassi e gieugh për ij cit, andrinta l’òsto e ‘dcò fòra ant l’èira.
Casa Scaparone Comunità Agricola s.s.agricola
Loc. Scaparone, 8 12051 Alba. Tel. e fax +39 0173 33.946
Casa Scaparone a l’é nen n’oberge e gnanca un ristorant. A l’é la nòstra vita, da spartì ansema a tuti coj ch’a na sento l’abzògn.
Për chi ch’a volèissa savèj quaicòs ëd pì...
La famija Scaparon a l’ha passà quàich sécol ëd soa esistensa ant la tranquilità e ant la semplicità ëd na vita campagnin-a. Tanti a son j’arcòrd e j’element che a testimonio e a documento sò passage: da l’época dle guère locaj tra le comun-e al passage ëd Napoleon con l’esèrcit ëd Fransa, quand le tasse an sla produssion vinìcola dla famija Scaparon a vnisìo versà al Tesorié dla Republica Fransèisa. Peuj l’ùltim na dla Ca, l’Avocat Bastianin. Peuj na stòria sensa ardité, ëd na cassin-a sempe pì gròssa për brass oramai tròp vej... Na stòria ëd temp ch’a cambio, d’economìe che a ten-o pì nen e ëd na modernisassion forsà che a l’ha tajà fòra tut lòn ch’a corèissa pì nen a sò ritm ëd mostra anmatìa...
La vegetassion, le piante e j’erbass a l’avìo protegiù costa ca... bandonà.
L’asienda a arnass con ël neuv milenari, quand che an costa Borgià Scaparon, na frassion dla gròssa Comun-a d’Alba, ant ël mesdì dël Piemont, a-i riva na famija giovo stabilendse... për coltivé la tèra.
Ël seugn: arlevé n’asienda ‘d na famija ch’a j’era dëstissasse ant j’agn Sinquanta, vivùa an tra coste muraje për 500 agn anviron, polidandla dai dann dël bandon, dla malacura, dal mal dël temp për arportela a sò antich splendor.
Prima ëd tut a ventava rangé ëd longh na ca për la famija dij proprietari neuv, ant lë dzèmber 1999, anté che ant la frèid dël diau, la desolassion ëd tut lòn ch’a j’era d’antorn, la sfiusa e ël fot dij pì difident, a l’é ancaminaje la sfida...
Tre agn ëd “travaj forsà” portà anans an prima përson-a da l’Equipe Scaparon, doi piemontèis e doi african, tuti d’artorn da l’Africa Sentrala; na restaurassion da ambalinà an dovrand metod ëd travaj ëd sent agn prima a l’ha përmëttù a Ca Scaparon ‘d torna luse da l’àut ëd soa borgià.
Bisson, ragnà e ronse a l’avìo lassà ël pòst a le nòstre fior, a le galin-e, a le dësmore për ij cit e a le caròsse alineà sota ij pòrti.
Da Natal 2010, Casa Scaparone a l’é diventà la ca ‘d na Comunità ‘d Famije ch’a l’é formasse an tra amis studios dl’eco-sostnibilità, dl’abzògn d’amposté torna ‘l rapòrt an tra òmo-bes-ce-piante-tèra për equilibré torna l’armonìa dël Creà. Da amis an marcia për la midema via, compagn dë studi e d’arserche, man a man bandonand ij rispetiv travaj e le sicurësse ‘d tuti ij dì, i soma butasse an gieugh. La condivision dla vita agrìcola cossienta a l’é për la comunità la Preghiera pì àuta ch’as peussa esprime an cost moment ëstòrich bon ben amportant.
Casa Scaparone Azienda Agricola a l’ha prodòt dal 2001 vin, formagg ëd crava e ‘d vaca, marmlade e conserve. Adess a slarga ij sò but con l’ingrandiment dle coltivassion dl’òrt, an sèra e fòra sèra, la macinassion a pera e la trasformassion ëd soe granaje.
Mentre che l’autonomìa alimentar a l’é stàit ël but dij primi des agn dl’asienda, adess la Comunità Agricola Casa Scaparone a mira a lë studi dël Nutriment, che a passa an tra l’equilibri dl’òmo a l’intern ëd sò ambient, dël Còsm, ël rapòrt con j’àutre forme ‘d vita, e la funsion ëd “colegament” che ‘l mangé a deuv torné a avèj për l’òmo. Coltivé cossientement la tèra ch’i l’oma an gestion, p gavé fòra dj’aliment ch’a son “mangé ch’a nuriss” për ël còrp e për lë Spìrit, e che an përmëtto ‘d vive an manera cossienta ‘l nòstr tèmp. Tanta atension a ven dàita a la formassion dij cit e dij fieuj che a l’han avù e a l’han la possibilità ‘d chërse fòra da jë “schema psicològich” che la sossietà dël materialism a l’ha oramai rendò obligatòri an tut ël mond.
La fatiga che ij mémber dla comunità a l’han fàit singolarment, durant soa vita, për trové un “passagi” an tra le maje spësse dla sossietà d’ancheuj, a së sta man a man trasformand an “agiut” e “grassia”, grassie ‘dcò a l’agiut dël Crist che a l’é col-lì che a trasforma ‘l mal an bin; l’esperiensa a mostra che l’union dj’òmo e dle fomne për un but consapevol a l’é bon a amplifiché le nòstre pòche fòrse an fasendje diventaé na fòrsa gròssa. E sòn a l’é lòn che la comunità a sta sërcand ëd vive tuti ij dì.
Ël riscaudament e la produssion d’eva càuda a fonsion-o esclusivament a bòsch, e con jë scart dël bòsch, la sarmenta e ij ram sèch.
Nòstra stassion ëd compostagi a ricicla l’amnis orgànica che a dventa drugia për l’òrt biodinamich. I bèivoma nòstra eva.
Ant ël rispet dl’architetura local e dla sobrietà dla ca a son nen stàite inserìe futilità tecnològiche che a l’avrìo trasformà costa ca ant n’oberge.
Le stansie a l’han ël bagn andipendent, la corent elétrica, ël riscaudament e dij let antìch con materass d’bon-a qualità. La resta i l’eve già a vòstra ca.
Ij materiaj ëd costrussion –caussin-a, bòsch e pianele ‘d mon – a son tute ‘d pianta ‘d seconda man, e dël pòst.
Ant l’obietiv dla lej Regional an sl’Agriturism, Casa Scaparone Comunità as adressa a j’abitant dle sità, për sparti con j’òspit soa ca e sò mond. An smonanda la possibilità ‘d passé na giornà an campagna e ëd conòsse le lavorassion, le gòj e le soferense dël mond rural.
Scrit da nojautri. Sit nòst. Fërvé 2011. Copyright SCAPARON Casa Scaparone Comunità Agricola - Agriturism - Cròta - Prodòt Agrìcoj
cost lì a l'é n'anliura a un sit ëd na madamin che a spart con mojautri, quaich seugn.